LA BETA DAL PAN
Art. Nosha Jent n. 6, an 1967 - Maestra Valeria
La Beta dal pan
Fosse stat la mare dei Bèc d’ades, l Tino, l Jan, l Bepo, la Nenola, la Luziola e la Verginia rechiesc. Se pense a na bona fémena me vegn en ment la Beta dal pan. L’à passà duta la vita a far pan e so om, l Bepo L ge aidava a meter int e tor fora l pan dal forn e a la stagion giusta l jiva a mazar porcié. Ence el l’era n bon om e me recorde che l ne fajeva i respec (per chi che no l saesse, l “respet” l’era n picol sculger de legn fata aposta per far l raspic, grazan fora la polpa de n rau o de n pom de alber: enloita l’era na golosarìa per i tosac..) a la stagion dei raves e l ne meteva su l paz de so gaiofe canche fajeane calche sbrion.
La Beta, che po’ l’aeva inom Catina, la era duc i dì te pistorìa, che enlaoita i l’aeva en ciasa. L’era la stua più grana del cartier. Veje amò davant da sta finestra n desch bad ma larch, con entorn na brea olache la pojava le panèe. E la Beta svelta e elegante en te la mossa con n raschet de fer la tirava vìa n mìngol de pasta e con l’autra man la la parava en ca e en la per ge dar stamp, dapò la petava su la panèa. Calche oita la me lasciava proar, ma emprima la me dijeva: “Asto le man nete”?
Sun n paré l’era tacà doi argagnes fac come doi sciale da bachec, e alò la meteva su le panèe col pan a levar.
Alora la jent la se fajeva far l pan de siala e te pistorìa: apena daìnt da usc a dreta, l’era na assa de sachec che spetava sova oita. I vegniva ence fora da Sorèga coi carnieres su la careta a portar a far su pan e chi che no aeva la siala enstes i la comprava via la copraiva. L pan de forment l’era beleche n lusso e i lo fajeva su da doman ben bonora per l medico, la calònega e per chi che aeva finì chel de siala.
La Beta l’aeva na pazienza unica a soportar duc. Ereane semper alò te pistorìa macimament d’invern a se sciaudar, l Menegoto e l Batistin nosc rechiesc, l’Amadio rechiesc, e i Bascioc e l Beni del Gabana, che l’era per jir sun gejia. Calche oita però la passava en prescia sun pont, coscita de manie de ciamija, che l’era so divisa de dut l’an. Alora dijeane:”Oh, la Beta la va con la carità. I purec i n’à ciapà, e come…”
Vìa noi no la vegniva, ma jiane ben noi da ela e me recorde cotant che ge fajeane pecià perche che ereane restè en set pìcoi zenza mare.
Le era state amiche con mia mare, estra che parente. Na oita, tant per se desvampolar n poch, le à dezidù de jir en devozion. Ma se sa no le podeva star lontane n pez e alora le à dit de jir sun Penia olache l’era la gejia de Sèn Giovani da Pumiceno, “che co sto rif scì vejin l ne vardasse vìa le ciase e i tosac”- E su sun Penia, mia mare coi più gregn e ela col Bepo.
Me recorde la festa che la ne à fat la velgia Maria de Penia e l gusto che l’à abù a ne mosciar la ciasa nova. En te la gejia aon preà. En tel vegnir en ju cancge sion stac sun Sort, la disc una: “Ades che l’è comet dijon su ancora le cent rechie” – “Scì scì”.
A mi ste pere cosse, la me parea che le aesse abù come scrupol a far i ultimes pasc zenza fadìa, come se le aesse avù paura de no far penitenza assà, le aeva semper en ment l purgatorio e se le podea l scurtar en te Deprufundis, e fra na cobia e l’autra:”Anime sante, anime purganti.. pregate Gesù per noi, che pregheremo per voi, acciò Dio conceda la gloria del santo Paradiso”. L’è emparada de colp e l’è stat bon perche che n par de mesc dapò mia mare la è morta. È scomenzà a la dir duc i dì e la die su amò ades.
Pol parer robe da nia, ma a mi sto pelegrinagio l me è restà tel cor e ge pense ancora ancondì che è passà i 60.
Maestra Valeria – Nosha jent n.6, an 1967
« archivio news
